Востраў свабоды зрынула ў змрок. На Кубе ўжо трое сутак няма электрычнасці — глядзіце, што там адбываецца

Ужо трэція суткі ўся Куба застаецца абясточанай, без электрычнасці ў краіне засталіся каля 10 мільёнаў чалавек. Насельніцтва Вострава свабоды мае праблемы не толькі са святлом, але і з водазабяспечаннем. Поўнае адключэнне электраэнергіі адбылося яшчэ ў пятніцу ў выніку выхаду з ладу мясцовай цеплаэлектрацэнтралі ў Матансасе. Улады краіны ўжо тройчы заяўлялі пра аднаўленне электразабяспечання, але ўсе гэтыя спробы заканчваліся чарговымі адключэннямі. Як краіна, цесныя адносіны з якой хоча развіваць Лукашэнка, перажывае маштабны блэкаўт — у нашай фотагалерэі.

На Кубе, якая змагаецца з праблемамі з харчаваннем, адключэнні электраэнергіі асабліва цяжка пераносяцца праз гарачае надвор’е, калі заснуць без вентылятараў проста немагчыма, а без лядоўняў запасы ежы ў насельніцтва хутка псуюцца. Людзі тэлефануюць сваякам і сябрам, каб спытаць, ці ёсць у іх месца для захоўвання невялікіх пайкоў мяса, якія дзяржава выдае самым уразлівым слаям насельніцтва.

Да таго ж на востраў, што застаўся без святла, абрынуўся чарговы ўраган «Оскар». Прэм’ер-міністр Мануэль Марэра Крус у тэлезвароце заявіў, што ў збоях вінаватыя зношаная інфраструктура, недахоп паліва і рост попыту на энэргію. Усе пяць асноўных электрастанцый краіны маюць узрост каля паўстагоддзя. Паводле Хорхе Піньёна, эксперта па энергасістэме Кубы ў Тэхаскім універсітэце, яны нашмат перавысілі запланаваны тэрмін службы.