Маштабны збой, звязаны з працоўнымі станцыямі Windows, закрануў буйныя кампаніі, уключаючы банкі і аэрапорты, піша The Guardian. Многія прадпрыемствы страцілі магчымасць нармальна функцыянаваць пасля таго, як на працоўных камп’ютарах Windows па ўсім свеце з’явіліся «сінія экраны смерці».
Карыстальнікі кампаніі Crowdstrike, якая займаецца кібербяспекай, паведамілі пра праблемы ў Індыі, ЗША і Новай Зеландыі. Аэрапорт аўстралійскага Мельбурна праінфармаваў кліентаў, што «паўстала глабальная тэхналагічная праблема, якая ўплывае на працэдуры рэгістрацыі некаторых авіякампаній», там параілі пасажырам «запланаваць трохі больш часу на рэгістрацыю».
Crowdstrike паведаміла пра тое, што назіраюцца «сінія экраны смерці», і заявіла, што прычына расследуецца. Паводле звестак кампаніі, праблема звязаная з яе прадуктам Falcon Sensor, і інжынерныя каманды працуюць над рашэннем, згодна з паведамленнем падтрымкі.
У ЗША адбыўся маштабны збой у працы авіякампаній: найбуйнейшыя перавозчыкі United Airlines, Delta Airlines і American Airlines прыпынілі палёты праз праблемы з сувяззю. З чым менавіта звязаныя непаладкі, не ўдакладняецца. Таксама аэрапорты Іспаніі сутыкнуліся з «інцыдэнтам у камп’ютарнай сістэме», гэта можа прывесці да затрымак рэйсаў, паведаміла кампанія-аператар Aena.
Кампанія Turkish Airlines таксама папярэдзіла пра глабальны збой, праз які ўзніклі сур’ёзныя праблемы з рэзервацыяй білетаў і рэгістрацыяй.