Ахвярамі абстрэлаў у Белгародскай вобласці за апошні тыдзень стала больш чым 90 чалавек, у тым ліку дзеці. Пра гэта паведаміў міністр аховы здароўя рэгіёна Андрэй Іконнікаў.
«Усяго за тыдзень з 12 да 18 сакавіка ў нас пацярпелых 93 чалавекі, 11 з іх загінулі», — прыводзіць словы міністра расійскага рэгіёна ТАСС.
Усяго шпіталізаваныя 43 чалавекі, у тым ліку двое дзяцей. Дзевяць чалавек знаходзяцца ў цяжкім, але стабільным стане. «Цалкам магчыма, будзе прынятае рашэнне пра шпіталізацыю іх у федэральны цэнтр», — дадаў Іконнікаў.
Губернатар Белгародскай вобласці Вячаслаў Гладкоў у панядзелак, 18 сакавіка, паведаміў яшчэ пра двух загінулых і чатырох пацярпелых. Паводле яго словаў, у выніку прамога трапляння ў прыватны жылы дом загінулі малады чалавек 17 гадоў і мужчына.
«Ратавальнікі дасталі з-пад завалаў гэтага ж дома маленькую дзяўчынку, у яе закрытая чэрапна-мазгавая траўма і пераломы канечнасцяў. Брыгадай хуткай дзіця дастаўленае ў дзіцячую абласную бальніцу. Дактары робяць усё магчымае, каб выратаваць яе жыццё. Аператыўныя службы працягваюць працу па разборы завалаў: у доме меркавана могуць знаходзіцца яшчэ дзве жанчыны. Пакуль іх пошукі вядуцца», — напісаў губернатар у сваім тэлеграм-канале.
⠀
Яшчэ тры пацярпелыя мужчыны, паводле яго словаў, ад шпіталізацыі адмовіліся. Неабходную медыцынскую дапамогу ім аказалі на месцы.