Украіна вярнула 11 дзяцей, якіх вывезлі ў Расію і акупаваныя рэгіёны краіны. Гэта адбылося пры спрыянні Катара, паведаміў кіраўнік Офіса прэзідэнта Украіны Андрэй Ярмак. Дзяцей прывезлі на радзіму праз Беларусь, вынікае з заявы дзіцячага амбудсмена РФ Марыі Львовай-Бяловай.
11 украінскіх дзяцей ва ўзросце ад 2 да 16 гадоў 20 лютага вярнуліся на радзіму пасля таго, як былі вывезеныя ў Расію і на акупаваныя тэрыторыі Украіны.
Андрэй Ярмак паведаміў, што ўз'яднанне сем’яў адбылося ва ўзаемадзеянні з упаўнаважаным Вярхоўнай рады па правах чалавека Дзмітрыем Лубінцом у межах праграмы Bring Kids Back UA. Акрамя таго, вяртанню ўкраінскіх дзяцей паспрыяў Катар.
Напярэдадні ўпаўнаважаная пры прэзідэнце Расіі па правах дзіцяці Марыя Львова-Бялова паведаміла, што дзеці былі вывезеныя з Украіны ў Запарожскую вобласць, акупаваныя Марыупаль, Луганск, Сімферопаль і расійскі Краснаярск. Іх маршрут назад на радзіму ляжаў праз Беларусь.
— Дзякуй Памежнай службе РФ і Памежнаму камітэту Беларусі, — напісала дзіцячы амбудсмен РФ.
Нагадаем, 17 сакавіка 2023 года Міжнародны крымінальны суд у Гаазе выдаў міжнародныя ордары на арышт прэзідэнта Расіі Уладзіміра Пуціна і ўпаўнаважанай па правах дзіцяці Марыі Львовай-Бяловай. Адзначана, што яны, як мяркуецца, нясуць адказнасць за ваеннае злачынства — незаконную дэпартацыю дзяцей і іх незаконнае перамяшчэнне з акупаваных тэрыторый Украіны на тэрыторыю Расійскай Федэрацыі.
ПАСЕ 27 красавіка 2023 года прыняў рэзалюцыю, у якой прызнаў гвалтоўную дэпартацыю ўкраінскіх дзяцей у Расію генацыдам, а Аляксандра Лукашэнку і ўрад Беларусі — датычнымі да яго.
Як вынікае са справаздачы Марыі Львовай-Бяловай, якая была апублікаваная ў канцы ліпеня мінулага года, з пачатку вайны з Украіны ў Расію былі вывезеныя 700 тысяч дзяцей. Украінскай службе «Радыё Свабода» Львова-Бялова заявіла, што ў расійскія сем'і «пад апеку і апякунства» перадалі 380 украінскіх дзяцей.
Чытайце таксама
