У сеціве напярэдадні позна ўвечары шырока разышлося шакавальнае відэа, на якім, як мяркуецца, украінскаму ваеннапалоннаму жыўцом адразаюць галаву. Пры гэтым мужчына ў вайсковай форме з жоўтай павязкай крычыць ад болю. Сапраўднасць відэа не пацверджаная.
«Адразай, ламай пазваночнік! <…> Што, ніколі бошкі не рэзаў?» — на кадрах чалавек у камуфляжы з закрытым тварам і белай павязкай на назе нажом адразае галаву палоннаму, які крычыць «балюча!», «не трэба!». Ахвяра ляжыць на зямлі ў камуфляжы і з жоўтай павязкай, якой сябе пазначаюць украінскія вайскоўцы, відаць таксама іншыя знакі адрознення УСУ. Некалькі чалавек, якія знаходзяцца вакол, крычаць таму, што з нажом: «Працуем, браты! Адразай, бл*ць! Ламай пазваночнік яму! Што, ніколі бошкі не рэзаў? Да канца, бл*ць».
Паведамляецца, што відэа з’явілася ў закрытым тэлеграм-канале стваральніка «Мужского государства» (расійскі экстрэмісцкі мужчынскі рух, які дэкларуе ідэі патрыярхату, расізму і нацыяналізму. — Заўв. рэд.) Уладзіслава Пазнякова, а затым разышлося па сеціве. Мы не публікуем яго з этычных меркаванняў.
Дзе, калі і кім было знятае відэа — невядома. Ва ўкраінскіх тэлеграм-каналах выказваецца здагадка, што гэта адбылося мінулым летам.
Афіцыйна відэа не каментавалі ні расійскі, ні ўкраінскі бок.
У тэлеграм-канале кіраўніка Офіса прэзідэнта Украіны Андрэя Ермака з’явіўся пост: «За ўсё будзе адказ і адказнасць».
Служба бяспекі Украіны заявіла пра пачатак дасудовага расследавання па артыкуле КК пра парушэнне законаў і звычаяў вайны.
Між тым CNN паведамляе пра яшчэ адно выяўленае падобнае відэа. Тэлеканал адзначае, што яно было, як мяркуецца, знятае наймітамі з ПВК Вагнера. Само відэа CNN не публікуе, але піша, што на ім — абезгалоўленыя трупы двух украінскіх салдат, у іх таксама адрэзаныя рукі.
Нагадаем, у пачатку сакавіка ў сеціве з’явілася відэа расстрэлу ўкраінскага ваеннапалоннага пасля таго як ён крыкнуў: «Слава Украіне!» Як пазней высветлілі, забіты — вайсковец УСУ Аляксандр Мацыеўскі.
Жэнеўская канвенцыя забараняе жорсткае абыходжанне з ваеннапалоннымі. Расія і Украіна перыядычна абвінавачваюць адна адну ў парушэнні гэтых правілаў. Так, у лістападзе мінулага года Следчы камітэт РФ распачаў крымінальную справу пасля з’яўлення відэазапісаў, зробленых у раёне вёскі Макееўка пад Сватавам у Луганскай вобласці. На першай з іх групу вайскоўцаў, як мяркуецца, у форме Узброеных сіл РФ бяруць у палон у двары жылога дома, затым з’яўляецца чалавек са зброяй, гучаць гукі стрэлаў, і відэа рэзка абрываецца. На другім ужо відаць целы 12 салдат у той жа форме.
У канцы ліпеня ў расійскіх тэлеграм-каналах апублікавалі відэа катаванняў ваеннапалоннага ўкраінца, у якім мужчыну адразалі геніталіі канцылярскім нажом.
