На дзяржтэлеканале «Беларусь 1» паказалі анонс прапагандысцкага фільма, прысвечанага справе пра «захоп улады». Галоўным героем роліка стаў асуджаны на 11 гадоў калоніі палітвязень Юрый Зянковіч. За два гады пасля суда галоўны фігурант крымінальнай справы вонкава моцна змяніўся.
У верасні 2022 года Юрыя Зянковіча асудзілі на 11 гадоў па «справе пра дзяржпераварот» разам з Рыгорам Кастусёвым (выйшаў на волю па памілаванні 3 ліпеня 2024 года) і Аляксандрам Фядутам, а таксама Вольгай Галубовіч і Дзянісам Краўчуком (ім далі па 2,5 года пазбаўлення волі). Зянковіч цалкам прызнаў віну і, як паведамлялася, заключыў пагадненне са следствам, абавязаўшыся дапамагчы «выкрыць» астатніх «змоўшчыкаў».
27 снежня 2022 года Зянковіча судзілі па артыкуле пра «абразу прадстаўніка ўлады» (артыкул 369 КК). Паводле інфармацыі праваабаронцаў, тым разам яму дадалі да тэрміну яшчэ паўгода.
7 жніўня 2024 года Юрыя Зянковіча судзілі за «злоснае непадпарадкаванне адміністрацыі папраўчай установы» (ч. 2 арт. 411 КК). Якое яму было прызначанае пакаранне, праваабаронцам не вядома.
Спачатку палітвязень адбываў пакаранне ў бабруйскай калоніі № 2, дзе на яго ціснулі. Зянковіч прабыў у штрафным ізалятары 8 дзён і абвясціў галадоўку. Пазней яму ўзмацнілі пакаранне і перавялі на турэмны рэжым у Магілёў.