На мінулым тыдні сілавікі пачалі пісаць людзям, якія знаходзяцца за мяжой і якія дапамагалі палітвязням і іх сем’ям. Прычыны не паведамляюць і просяць выйсці на сувязь. Як расказалі «Люстэрку» ў ініцыятыве Dissident.by, ужо вядома пра некалькіх такіх выпадкаў.
Цікавасць да тых, хто дапамагае палітвязням і іх сем’ям, удзельнікі ініцыятывы заўважылі яшчэ пасля рэйду 23−24 студзеня па «справе INeedHelpBy».
Тады многім людзям з Беларусі тэлефанавалі супрацоўнікі СК, каб распытаць, каму яны рабілі пераводы. Dissident.by фіксаваў дзясяткі такіх выпадкаў. Праз нейкі час званкі спыніліся. Праз два месяцы сілавікі актывізаваліся зноў.
— Беларусам за мяжой пачалі паступаць паведамленні на мінулым тыдні, — расказалі актывісты. — Мы ведаем пра некалькі выпадкаў. Людзі ўсё гэта праігнаравалі і звярнуліся да нас. Гэта дакладна былі не ашуканцы: мы прабівалі нумары, з якіх звязваюцца, і яны сапраўды належаць сілавікам.
Вядома, што такія паведамленні прыходзілі ад супрацоўнікаў Мінскага, Брэсцкага і Гродзенскага СК, а таксама ГУБАЗіКа.
— Прычым звязваюцца не толькі з тымі, хто дапамагаў сем’ям ці палітвязням. Ёсць людзі, якія данацілі ў 2020-м (да прыкладу, чалавек перавёў 20 еўра BYSOL), — удакладнілі ў арганізацыі.
Нагадаем, масавы рэйд па былых палітычных зняволеных і сваяках цяперашніх пачаўся 23 студзеня. Людзей дапытвалі і затрымлівалі. Сілавікоў цікавілі тыя, хто атрымаў прадуктовую дапамогу ад ініцыятывы INeedHelpBY. Звесткі пра атрымальнікаў такой дапамогі яны ўзялі з сэрвісу «Е-дастаўка», які належыць «Еўраопту». Аднак затрымлівалі не толькі тых, каму дапамог INeedHelpBY. Паводле звестак праваабаронцаў, пераслед зазналі прынамсі 275 чалавек.
Чытайце таксама
