Стала вядома, што 15 лістапада 2023 года ў судзе Глуска на дзесяці месяцаў абмежавання волі без накіравання ў ПУАТ («хатняй хіміі») асудзілі менеджарку Вольгу Галамака. Яе прызналі вінаватай па арт. 369 Крымінальнага кодэкса (Абраза прадстаўніка ўлады) праз сторыз у Instagram пра інспектара ДПС, паведамляе праваабарончы цэнтр «Вясна».
Акрамя гэтага, яна павінная выплаціць штраф у памеры 40 базавых велічынь (1480 рублёў), матэрыяльную кампенсацыю маральнай шкоды ў памеры 600 рублёў і дзяржпошліну на карысць дзяржавы ў памеры 111 рублёў. Вядома, што Вольга — удава, якая выхоўвае траіх няпоўнагадовых дзяцей. Яна была на волі да суда, але яе затрымлівалі на некалькі сутак да выстаўлення абвінавачання.
Суддзя Вольга Галаўнёва прызнала яе вінаватай у тым, што яна запосціла ў Instagram сторыз, што нібыта абражалі мясцовага інспектара ДПС. Вольга Галамака прызнала віну і расказала, што размясціла ролік з ім, бо была пакрыўджаная тым, што супрацоўнік склаў на яе пратакол пра адміністрацыйнае правапарушэнне. Калі яе спынілі, у машыны не было пасведчання пра тэхнічнае абслугоўванне. Сторыз магло паглядзець каля 60 чалавек — менавіта столькі ў жанчыны падпісчыкаў.
Супрацоўнік ДПС запытаў пазоў у памеры 5000 рублёў, аднак Вольга Галамака адзначыла, што гэтая сума занадта высокая для яе. Суддзя зменшыла яе да 600 рублёў, якія жанчына павінная выплаціць на карысць «пацярпелага».