Медыкі хуткай, на якіх у суботу падчас выкліку напаў пацыент, адчуваюць сябе нармальна. Інфармацыя пра гэта з’явілася ў тэлеграм-канале гарадской станцыі хуткай медыцынскай дапамогі Мінска. Паводле інфармацыі «Люстэрка», мужчыны цяпер праходзяць лячэнне ў аддзяленні нейрахірургіі.
Два пацярпелыя фельчары знаходзяцца ў 5-й бальніцы Мінска.
— Агульны стан пацыентаў ацэньваецца як сярэдняй ступені цяжкасці. Супрацоўнікамі бальніцы праводзіцца ўсё неабходнае лячэнне. Адчуваюць хлопцы сябе нармальна, перадаюць прывітанне калегам і дзякуюць ім за суперажыванне, — адзначае тэлеграм-канал Гарадской станцыі хуткай медыцынскай дапамогі Мінска.
Паводле інфармацыі «Люстэрка», мужчыны цяпер праходзяць лячэнне ў аддзяленні нейрахірургіі. У суботу пасля інцыдэнту іх наведаў міністр аховы здароўя.
— Наколькі мне вядома, цяпер яны адчуваюць сябе трошкі лепей, — апісвае стан медыкаў нашая крыніца ў сталічнай сістэме аховы здароўя. — Адзін з пацярпелых фельчараў памятае пра інцыдэнт цьмяна, але галава ў яго ўжо не баліць. Калі яго выпішуць, пакуль ніхто не кажа. Другі фельчар, відаць, прабудзе ў бальніцы мінімум тыдзень.
Нагадаем, 10 лютага падчас выкліку на двух медыкаў спецыяльнай брыгады, якая займаецца людзьмі з псіхічнымі парушэннямі, напаў пацыент з сякерай. Абодва фельчары атрымалі траўмы і былі дастаўленыя ў 5-ю бальніцу Мінска.
Паводле інфармацыі крыніцы «Люстэрка», міліцыянта з медыкамі не было, «хоць на раёне выязджае з брыгадай супрацоўнік міліцыі». Бацька пацыента праваахоўнікаў таксама не выклікаў. Хоць медработнікі, якія раней прыязджалі да іх на выклікі, прасілі гэта рабіць.
«У пацярпелых дыягнаставаныя спалучаныя траўмы. Агульны стан расцэньваецца як сярэдняй ступені цяжкасці, праводзіцца ўсё неабходнае лячэнне», — паведамлялі 10 лютага ў Мініздароўя.
Нападнік — 33-гадовы мужчына. 10 лютага тэлеграм-канал, набліжаны да сілавікоў, паведамляў, што супрацоўнікі «даставілі хворага ў райаддзел для разбіральніцтва». Пазней яго транспартавалі ў РНПЦ псіхічнага здароўя. У дачыненні да мужчыны завялі крымінальную справу.
Чытайце таксама
