Заснавальнікаў ТАА «Бонусторг», якому належыць выданне «Аўтабізнес», «папрасілі» пракаментаваць нядаўні арышт дырэктара кампаніі Віталя Палякова. Яны пракаментавалі — і паведамілі, што закрываюць праект ABW.BY.
У заяве ўласнікаў гаворыцца, што Віталь Палякоў быў прыняты на працу 29 верасня гэтага года з выпрабавальным тэрмінам тры месяцы і акладам у памеры 3600 рублёў з магчымымі прэміяльнымі надбаўкамі. На момант затрымання ён не прапрацаваў у калектыве яшчэ і месяца і не атрымаў ніводнага заробку.
«Зыходзячы з рэзюмэ прэтэндэнта на пасаду падчас прыёму на працу мы можам разумець, падыходзіць ён нам як спецыяліст ці не. Але мы не правяраем яго асабістае жыццё, кола знаёмстваў і перапіскі ў мэсэнджарах, бо не маем для гэтага функцый і паўнамоцтваў як у МУС, пракуратуры і іншых органаў улады. Усе супрацоўнікі нашай кампаніі ведаюць, што „Аўтабізнес“ — гэта пра аўта-, мотатэхніку і ўсё, што з імі звязана, але не пра палітыку», — адзначылі заснавальнікі.
«Адносна нашых палітычных поглядаў ці грамадзянскай пазіцыі. Мы палітычна не ангажаваныя, ні ў чым не ўдзельнічалі, нікога не фінансавалі і, згодна з меркаваннем, выказанага Аляксандрам Лукашэнкам у адным з інтэрв'ю, што ў бізнесоўца — або бізнес, або палітыка, заўсёды выбіралі бізнес», — гаворыцца ў заяве.
Заснавальнікі таксама заявілі, што сёння праз розныя абставіны падышлі да моманту, калі гатовыя спыніць працу сайта ABW.BY.
«З пачаткам пандэміі, наступнымі эканамічнымі санкцыямі прадпрыемства стала стратным, бо прыбытковасць аўтамабільных парталаў звязаная з агульным становішчам на аўтарынку краіны. Мы тры гады спрабавалі паправіць сітуацыю да лепшага, у тым ліку наймаючы добрых праграмістаў, змяняючы дырэктараў. Не хацелася спыняць гісторыю, на нашую думку, найлепшай у краіне аўтамабільнай журналістыкі, якая бярэ свой пачатак у 1993 годзе, яшчэ з газеты „Аўтабізнес“», — гаворыцца ў заяве.
Уласнікі паабяцалі выплаціць супрацоўнікам усе належныя па законе «кратныя аклады і нават больш у выглядзе выхадных дапамог».
Нагадаем, 28 кастрычніка ў тэлеграм-канале ГУБАЗіК з’явілася відэа затрымання дырэктара партала ABW.BY Віталя Палякова. Яго прымусілі сказаць, што ён браў удзел у акцыях пратэсту, а таксама назваць свой заробак.
Паводле звестак сілавікоў, уладальнікі сайта ABW.BY — таксама ўласнікі slivki.by, bamper.by, рэстарана «Арбат», паба «Пена» і ў дадатак маюць ВНЖ і іншы бізнес у Еўрасаюзе. Сілавікі таксама прыгразілі ўладальнікам бізнесу, якія, паводле іх, цяпер адпачываюць у экзатычных краінах: «Стаміліся, набіраюцца сіл. Яны ім спатрэбяцца. Хутка».
Нагадаем, у студзені гэтага года суд Фрунзенскага раёна Мінска асудзіў галоўную рэдактарку ABW.BY Юлію Мудрэўскую на 1,5 года калоніі па артыкуле аб парушэнні грамадскага парадку, а рэдактара спецпраектаў партала Юрыя Гладчука — на 2,5 года калоніі.
Інтэрнэт-партал ABW.BY працаваў з 2006 года. Гісторыя праекта пачалася ў 1993 годзе з выхадам газеты «Аўтабізнес».