МЗС Польшчы апублікавала заяву ў сувязі з карупцыйнай справай, якая набірае абароты і датычыць выдачы візаў. Заяву прыводзіць прэс-служба ведамства.
У сувязі з «высновамі пра парушэнні ў працэсе выдачы візаў» міністр замежных справаў вырашыў зняць з пасады дырэктара юрыдычнага ўпраўлення МЗС Якуба Асайду і правесці аўдыт у консульскім аддзеле МЗС і ўсіх консульскіх установах Польшчы.
Акрамя таго, у заяве гаворыцца, што даручана «скасаваць кантракты з усімі аўтсорсінгавымі кампаніямі, якім з 2011 года даручана працаваць з візавымі анкетамі».
Пакуль невядома, ці закране гэта візавыя цэнтры Польшчы VFS Global у Беларусі. Гэтыя цэнтры — практычна адзіная магчымасць для беларусаў атрымаць польскую візу. На сайце аператара ніякіх абвестак няма.
Скандал з выдачай візаў у Польшчы
Нагадаем, улады Польшчы праводзяць праверку праз завялікую колькасць выдадзеных замежнікам візаў. Польскія СМІ заяўляюць пра карупцыйныя схемы ў МЗС краіны. Напрыклад, яны сцвярджаюць, што створаная міністэрствам спрошчаная візавая сістэма толькі спрыяла карупцыі — яна дазваляла абмінуць чаргу з дапамогай фірмаў-пасярэднікаў, якія дапамагалі замежнікам атрымаць польскую візу за 4−5 тысяч даляраў.
Gazeta Wyborcza паведаміла дадатковыя падрабязнасці візавага скандалу. Паводле звестак выдання, праверка ў польскім МЗС звязаная з «міжнародным расследаваннем дзейнасці індыйскай кампаніі VFS Global, пасярэдніка ў атрыманні віз».
Велізарная карпарацыя VFS Global займаецца пасярэдніцтвам у падачы заяваў на візы і дапамогі ў іх запаўненні ў 70 краінах, у тым ліку ў Беларусі. На практыцы падаць заяву на візу ў абыход гэтай кампаніі практычна немагчыма, бо карпарацыя стварыла манаполію на паслугі па падачы дакументаў на візу, піша выданне.
Больш за тое, супрацоўнікі VFS нібыта часта падыходзілі да людзей, якія не змаглі падаць заяву, і наўпрост прапаноўвалі ім дапамогу ў падачы за 500−800 еўра.
Польскае МЗС сцвярджае, што не супрацоўнічае з VFS, а з кампаніяй звязаныя толькі польскія амбасады і консульствы. Там таксама абверглі абвінавачванні ў тым, што польскія консулы за мяжой нібыта атрымлівалі загады з МЗС наконт выдачы візаў.
У ведамстве назвалі ілжывымі заявы пра тое, што Польшча — лідар ЕС па выдачы дазволаў на ўезд у Шэнгенскую зону. І прывялі спасылку на статыстыку, згодна з якой краіна знаходзіцца па гэтым паказчыку толькі на 15-м месцы сярод усіх краін Еўрасаюза (першыя радкі займаюць Францыя, Іспанія і Германія).
Чытайце таксама
