У жніўні сайт, які раней належаў беларускаму выданню «Народная Воля», змяніў уласніка. Нядаўна там заўважылі змены ў падачы інфармацыі. Высветлілася, што былых журналістаў «Народнай Волі» адхілілі ад працы.
Цяпер сайт nv-online.info належыць фірме «Гіпер ПК». Цяпер рэсурс называецца «НВ Анлайн». Як піша «Наша Ніва», за апошні час у падачы матэрыялаў адбыўся карэнны пералом — з’явіліся, напрыклад, прарасійскія наратывы.
Экс-галоўны рэдактар «Народнай Волі» Іосіф Сярэдзіч, які ў пачатку жніўня паведаміў, што сыходзіць на пенсію, расказаў журналісту Аляксандру Стрыжневічу, што перадаў сайт новаму ўласніку бясплатна, але з умовай — што кантэнтам будуць займацца журналісты, якія ўваходзілі ў штат газеты.
«Сёння, 15 верасня, я даведаўся, што адзін з кіраўнікоў „Гіпер ПК“ адхіліў гэтых журналістаў ад супрацоўніцтва. А цяпер нібыта сам напаўняе інфармацыйную стужку сайта», — сказаў Сярэдзіч.
Былы галоўны рэдактар «Народнай Волі» заявіў, што збіраецца прыняць меры, каб «аднавіць законнасць».
«Гэтая інфармацыя як снежны ком на галаву. Мне шкада журналістаў. Я быў упэўнены, што яны будуць працаваць на адпаведным узроўні, а аказаліся ля разбітага карыта. Мне незразумелыя дзеянні тых, каму я бясплатна памылкова перадаў сайт», — сказаў Сярэдзіч.
Ён таксама паведаміў, што кіраўнік «Гіпер ПК» — не прафесійны журналіст.
Нагадаем, «Народная Воля» была адной з найстарэйшых беларускіх незалежных газет.
У 2020 годзе выданне, як і іншыя незалежныя СМІ, асвятляла масавыя мірныя пратэсты беларусаў. Гэта выклікала рэпрэсіі ў адказ. Газету адмовіліся друкаваць у Мінску, а потым і ў Расіі. З таго часу газета выпускалася толькі ў электронным варыянце — карыстальнікі маглі аформіць падпіску на PDF-версію. У жніўні 2022-га сайт «НВ» заблакавала Міністэрства інфармацыі — паўнавартасна ён зноў пачаў працаваць толькі ў студзені 2023-га. У тым жа месяцы рэдакцыя выпусціла апошні нумар у PDF. Мінінфарм у чэрвені ануляваў пасведчанне аб дзяржаўнай рэгістрацыі «Народнай Волі».
4 жніўня Іосіф Сярэдзіч абвясціў, што пакідае пасаду галоўнага рэдактара «Народнай Волі».
