Сумеснае даследаванне канадскіх і амерыканскіх навукоўцаў паказала, што людзі, якім рабілі аперацыі жанчыны-хірургі, паміраюць і сутыкаюцца з ускладненнямі радзей, чым пацыенты хірургаў-мужчын. На гэта звярнула ўвагу навукова-папулярнае выданне Naked Science.
Даследчыкі даўно спрабуюць зразумець, ці ёсць сувязь паміж полам хірургаў і вынікам праведзеных імі аперацый. Яшчэ ў 2017 годзе навукоўцы з Універсітэта Таронта выявілі, што ў пацыентаў жанчын-хірургаў рызыка памерці цягам месяца пасля працэдуры меншая, чым у іх калегаў-мужчын. Аднак было незразумела, наколькі можна верыць гэтым назіранням: магчыма, вынікі былі недакладнымі з прычыны невялікага перыяду назірання пасля аперацыі.
Гэтым разам даследчыкі Універсітэта Таронта працавалі разам са спецыялістамі з ЗША. Сумесна яны аналізавалі выпадкі больш чым мільёна дарослых людзей, якім праводзілі экстранныя або планавыя аперацыі з 2007 да 2019 года. Пасля ўмяшанняў стан пацыентаў правяралі праз 90 дзён, а потым — праз год.
У суме праз 90 дзён ускладненні або смяротны вынік наступілі ў 14,3% праапераваных. Праз год — яшчэ ў 25% пацыентаў. Але выявілася, што калі разгледзець атрыманыя звесткі з улікам полу хірурга, то хворыя, якія трапілі ў рукі жанчын-хірургаў, маюць лепшыя шанцы на беспраблемнае аднаўленне.
Напрыклад, у тых, каго аперавалі мужчыны, неспрыяльны вынік праз 90 дзён зафіксаваны ў 13,9% выпадкаў. А ў тых, каму аперацыю рабіла жанчына, паказчык быў ніжэйшы — 12,5%. Праз год пасля ўмяшання розніца стала яшчэ больш істотнай: у пацыентаў мужчын-хірургаў праблемы былі ў 25% выпадкаў, а ў тых, каго лячылі жанчыны-хірургі, — усяго ў 20,7%.
Навукоўцы таксама праверылі выключна статыстыку смяротнасці ўдзельнікаў даследавання. Тут звесткі таксама на карысць спецыялістак: памерлых пацыентаў, якія прайшлі праз іх аперацыі, аказалася на чвэрць менш, чым у калегаў-мужчын.
У дзень публікацыі гэтага даследавання часопіс Jama Surgery напісаў пра яшчэ адно даследаванне — ужо ад шведскіх спецыялістаў. Яно таксама пацвердзіла, што ў пацыентаў жанчын-хірургаў шанцы на спрыяльны вынік вышэйшыя.
Нагадаем, у ліпені 2023 года стала вядома, што Беларускі дзяржаўны медыцынскі ўніверсітэт падзяліў будучых спецыялістаў-хірургаў і анестэзіёлагаў-рэаніматолагаў на «асобаў жаночага і мужчынскага полу». Для дзяўчат у субардынатуры — то-бок працягу навучання па канкрэтнай спецыяльнасці пасля 5 курса — вылучылі значна менш месцаў. Акрамя таго, хлопцам было дастаткова ніжэйшага сярэдняга бала.
— Хірургічныя спецыяльнасці — гэта доля мужчын. Анестэзіялогія і рэанімацыя — у тым ліку, — каментавала такое рашэнне начальніца ўпраўлення кадравай палітыкі Мінздароўя Вольга Калюпанава. — Досвед паказвае, што вельмі многія жанчыны праз паўгода інтэрнатуры просяцца з анестэзіялогіі ў тэрапеўтычныя спецыяльнасці. Пры гэтым яны займаюць нечыя месцы — тых жа мужчын, бо ў іх балы былі крыху меншыя. Паколькі жанчыны старанней вучацца, яны лунаюць у аблоках, думаючы, што анестэзіялогія — гэта жаночая спецыяльнасць. Не, гэта мужчынская спецыяльнасць.
Чытайце таксама
