Міністэрства абароны Беларусі актуалізавала і канкрэтызавала пералік транспартных сродкаў, якія падлягаюць аддаванню ўзброеным сілам і іншым фарміраванням у перыяд мабілізацыі і ў ваенны час. Адпаведная пастанова ведамства апублікаваная на Нацыянальным прававым інтэрнэт-партале Беларусі.
«Устанавіць пералік транспартных сродкаў, якія падлягаюць перадачы Узброеным сілам Рэспублікі Беларусь, іншым войскам, вайсковым і спецыяльным фарміраванням у перыяд мабілізацыі і ў ваенны час, згодна з дадаткам», — гаворыцца ў дакуменце.
Пад патрэбы ведамства пераходзяць усе транспартныя сродкі дзяржаўных органаў, іншых арганізацый незалежна ад формаў уласнасці, якія з’яўляюцца ўласнікамі транспартных сродкаў або валодаюць транспартнымі сродкамі на праве гаспадарчага вядзення або аператыўнага кіравання.
Акрамя таго, транспартныя сродкі будуць забіраць і ў насельніцтва, а менавіта:
- легкавыя аўтамабілі з колавай формулай 4×4;
- аўтобусы;
- грузавыя аўтамабілі: бартавыя, самазвалы;
- грузавыя аўтамабілі са спецыяльнымі кузавамі: аўтарэфрыжэратары, аўтафургоны ізатэрмічныя, аўталаўкі, аўтахлебавозкі, фургоны на шасі грузавых аўтамабіляў;
- спецыяльныя аўтамабілі: аўтавышкі, аўтакраны, аўтацыстэрны для вады і харчовых прадуктаў, палівацыстэрны, палівазапраўнікі, іншыя спецыяльныя;
- грузапасажырскія аўтамабілі;
- седлавыя цягачы;
- прычэпы аўтамабільныя;
- паўпрычэпы аўтамабільныя;
- трактары;
- прычэпы трактарныя;
- паўпрычэпы трактарныя;
- самаходныя машыны;
- квадрыцыклы;
- снегабалотаходы колавыя малагабарытныя (квадрацыклы).
Пастанова ўступае ў сілу пасля яе афіцыйнага апублікавання.