У ток-шоу ў эфіры СТБ прагучала нечаканая прапанова: адмяніць выходны на 3 ліпеня, таму што большасць беларусаў усё адно бавіць яго за горадам і «асабліва пра Дзень незалежнасці не думае». Але госці праграмы запярэчылі, што выходны ў гэты дзень неабходны — бо «ідэалагічны складнік» і «традыцыі выпівання».
Вядоўца ток-шоу «По существу» Алёна Сырава задалася пытаннем, ці не варта адмяніць выходны на Дзень незалежнасці, які адзначаецца ў Беларусі 3 ліпеня. На яе думку, гэтае дзяржаўнае свята «дзесьці замыльваецца з Днём Перамогі», да таго ж адзначаць яго на вуліцы выходзіць «не так шмат людзей».
— Дзень у нас выходны: субота, нядзеля, панядзелак. Дзе большая частка? За горадам адпачываюць і, ужо прабачце за шчырасць, асабліва пра Дзень незалежнасці не думаюць, — панаракала вядоўца.
— Можа быць, з пункту гледжання эканомікі зноў жа, 3 ліпеня не рабіць выходным днём, а рабіць рабочым, а ўвечары ўсім разам адпачываць? — прапанавала яна. Але натыкнулася на пратэсты іншых удзельнікаў перадачы.
Спявачка Вікторыя Алешка, якая 3 ліпеня выступала ў Лагойску, прызнала, што ў той дзень на канцэрце «не было мора людзей, вядома ж». Аднак нават нешматлікія госці свята «з задавальненнем атрымлівалі асалоду, нягледзячы на пякучае сонца».
— Таму я не ўяўляю, калі б гэта быў бы працоўны дзень. Увогуле, не, — сказала яна.
Іншы вядоўца СТБ, Кірыл Казакоў, патлумачыў выходны 3 ліпеня «асаблівым сэнсам» і «нейкай сакральнасцю». На яго думку, заключаюцца яны ў тым, каб у гэты дзень «прыйсці дадому, накрыць стол, сесці з сям’ёй, выпіць».
А старшыня Беларускай асацыяцыі дактароў Дзмітрый Шаўцоў лічыць, што ў Дні незалежнасці ёсць «ідэалагічны складнік», да таго ж гэта «месца сустрэчы, законная камунікацыя, выпіванне з нагоды свята».
— Я без сарказму кажу, гэта насамрэч традыцыя, выхаваная гадамі, дзесяцігоддзямі, — заявіў ён.
Дзень незалежнасці адзначаецца 3 ліпеня, у гадавіну вызвалення Мінска ад нацысцкай акупацыі ў 1944 годзе. Гэтую дату сваім дэкрэтам у 1996-м прызначыў Аляксандр Лукашэнка — спачатку Дзень незалежнасці адзначалі 27 ліпеня, у дзень прыняцця Дэкларацыі аб дзяржаўным суверэнітэце Беларусі.
