Найбліжэйшы час пасля памілавання расіянка Соф’я Сапега прабудзе са сваёй сям’ёй. Для яе гэта вельмі актуальна, бо спатканняў з роднымі ў калоніі ў яе не было. Яна таксама каротка пракаментавала журналісту «Камсамольскай праўды» Аляксандру Гамаву сваё стаўленне да Рамана Пратасевіча.
Сапега расказала, што памілаванне для яе было нечаканым. Ёй зачыталі рашэнне Аляксандра Лукашэнкі і выпусцілі з калоніі.
«Першапачаткова, вядома, я хачу пабыць нейкі час са сваёй сям’ёй. Хачу аднавіць сябе. І ўжо пасля, сапраўды, задумацца над тым, як далей будаваць сваё жыццё», — сказала Соф’я.
Дзяўчына расказала, што ў яе не было спатканняў у калоніі з роднымі.
Ёй таксама задалі пытанне пра Рамана Пратасевіча і яе стаўленне да яго.
«Насамрэч я, напэўна, зраблю… правільней, калі… нічога не скажу пра гэтага чалавека. Проста пажадаю яму пражыць гэтае жыццё годна. І на гэтым, напэўна, усё», — сказала Соф’я.
Нагадаем, Соф’ю Сапегу затрымалі 23 траўня 2021 года разам з былым галоўным рэдактарам тэлеграм-канала NEXTA Раманам Пратасевічам у мінскім аэрапорце пасля таго, як улады Беларусі пасадзілі самалёт авіякампаніі Ryanair, што ляцеў з Афін у Вільнюс. Пара вярталася з адпачынку. Дзяўчыну абвінавацілі ў адміністраванні тэлеграм-канала «Чорная кніга Беларусі», у якім публікуюцца асабістыя звесткі сілавікоў.
Сапегу асудзілі на шэсць гадоў калоніі агульнага рэжыму. У памілаванні ёй спачатку адмовілі. У красавіку 2023 года стала вядома, што Соф’ю Сапегу, магчыма, адправяць даседжваць тэрмін у Расію. Але 7 чэрвеня яе памілавалі.
За час суда над Соф’яй і яе знаходжання ў калоніі Раман Пратасевіч, яе былы малады чалавек, паспеў ажаніцца і стаць бацькам. Таксама паведамляецца, што ён даў паказанні на Соф’ю.