У Беларусі ўнеслі змены ў Належную аптэчную практыку. Гэта зроблена пастановай Міністэрства аховы здароўя, якая была апублікаваная сёння на Нацыянальным прававым інтэрнэт-партале.
З Належнай аптэчнай практыкі выключаны пункт 101 — «аптэкай пятай катэгорыі ажыццяўляецца рэалізацыя лекавых прэпаратаў, што рэалізуюцца без рэцэпту доктара, за выключэннем аптэк, якія ажыццяўляюць бясплатнае і льготнае забяспечанне лекавымі сродкамі і перавязачнымі матэрыяламі асобных катэгорый грамадзян».
Гэта азначае, што невялікія прыватныя аптэкі па-ранейшаму змогуць прадаваць лекі па рэцэпце.
Нагадаем, менавіта пятай катэгорыі, да якой і належыць большасць камерцыйных аптэк, хацелі забараніць прадаваць лекі па рэцэпце. Пры гэтым Міністэрства аховы здароўя зрабіла выключэнне: прадаваць па рэцэптах па-ранейшаму маглі б дзяржаўныя аптэкі пятай катэгорыі.
Забарона прадаваць рэцэптурныя лекі пагражала камерцыйным аптэкам зніжэннем колькасці кліентаў, змяншэннем выручкі і магчымым закрыццём. Акрамя таго, забарона Мінздароўя адбілася б і на простых людзях. Напрыклад, у горадзе Смалявічы засталося б толькі тры аптэкі, дзе яны маглі б купіць лекі па рэцэпце ўвечары пасля працоўнага дня, і толькі адна, дзе гэта можна было б зрабіць у нядзелю. Падобныя праблемы пагражалі большасці невялікіх гарадоў Беларусі.
Забарона на рэалізацыю лекаў па рэцэпце ў аптэках пятай катэгорыі мусіла ўступіць у сілу з 1 чэрвеня. Але ў справу ўмяшалася МАРГ: увядзенне Мінздароўя забароны на продаж лекавых прэпаратаў, што рэалізуюцца па рэцэпце доктара, аптэкамі пятай катэгорыі ведамства назвала «дыскрымінацыйнымі ўмовамі» і запатрабавала выключыць гэты пункт з пастановы.