У Беларусі ёсць Рэспубліканскі савет па гістарычнай палітыцы пры Адміністрацыі Аляксандра Лукашэнкі. А ўзначальвае яго Ігар Сяргеенка, кіраўнік гэтай жа Адміністрацыі. У інтэрв'ю выданню «СБ. Беларусь сегодня» ён расказаў, каго можна лічыць нацыянальным героем Беларусі, а каго не.
На думку Сяргеенкі, крытэры вызначэння нацыянальнага героя празрыстыя.
— Гэта чалавек, які ў цяжкі перыяд (як героі Вялікай Айчыннай вайны) або ў крытычнай сітуацыі (як нашыя лётчыкі, Героі Беларусі, Уладзімір Карват, Андрэй Нічыпорчык, Мікіта Куканенка) робіць неймаверна мужны выбар. Ахвяруе або рызыкуе сваім жыццём, абараняючы родную зямлю, людзей. Ці самааддана жыве, аддаючы ўсяго сябе высакароднай ідэі, якая служыць на карысць, акцэнтую, свайго народа, як савецкія Героі Сацыялістычнай Працы, Герой Беларусі Мітрапаліт Філарэт, — растлумачыў кіраўнік савета.
Пры гэтым, адказваючы на пытанне ананімнага супрацоўніка выдання, «што рабіць з персанажамі такіх супярэчлівых эпох, як ВКЛ, Рэч Паспалітая», ён адзначыў, што з вышэйназванымі крытэрамі складана падыходзіць да ацэнкі вядомых асобаў гэтых эпох.
— Скажам, ці можна назваць нацыянальным героем Касцюшку? Асоба яркая. Быў высакародны. Самааддана служыў ідэі. Але гэтая ідэя не была беларускай. Так, мы не можам выкрасліць яго са сваёй гісторыі, гэта супраць нашых прынцыпаў. Але павінныя дакладна вызначыць яго ролю ў ёй, каб, як вы правільна заўважылі, нашыя дзеці разумелі, на каго раўняцца. Таму што сфальсіфікаваны вобраз нацыянальнага героя здольны ў роўнай ступені як аб’яднаць, так і раскалоць грамадства. Прыклад таму — створаны ў савецкай гістарыяграфіі міф пра Каліноўскага. Мы ўбачылі на свае вочы, як небяспечна скажаць факты ці хаваць частку праўды. Савецкае пакаленне вырасла на прыкладзе гераічнай барацьбы рэвалюцыянера Каліноўскага з царызмам. А сёння на асобе гэтага так званага героя, на прыкладзе яго барацьбы за ідэю аднаўлення польскай Рэчы Паспалітай грае знешні вораг, спрабуючы забіць клін паміж брацкімі народамі, раскалоць грамадства ўнутры адной краіны, — заявіў Сяргеенка.
Ананімны супрацоўнік выдання таксама заявіў, што апублікаваныя «падрабязнасці зверскіх расправаў каліноўцаў з беларускім праваслаўным насельніцтвам» (на якія публікацыі спасылаецца ананім, не гаворыцца. — Заўв. рэд.).
На гэта Сяргеенка паведаміў, што савет «працягне працу па развянчанні такіх міфаў».
— Так, многія ўраджэнцы Беларусі маюць сусветную вядомасць. Мы можам ганарыцца тым, што на нашай зямлі нараджаюцца геніі. Але, напрыклад, ці назавём мы сваім нацыянальным героем таленавітага навукоўца, які супрацоўнічаў у гады акупацыі з немцамі, пасля вайны жыў і працаваў у ЗША? Не проста працаваў. У самы разгар Халоднай вайны ўдзельнічаў у распрацоўках паліва для касмічных караблёў і ракет, якія былі скіраваныя на яго радзіму, — прывёў у прыклад Барыса Кіта Ігар Сяргеенка.
Ён яшчэ раз адзначыў, што п"атрэбныя дакладныя крытэры ацэнкі ўкладу асобы ў гісторыю сваёй краіны і маркеры недатычнасці да гэтай гісторыі, такія як факты служэння інтарэсам іншых дзяржаваў", і толькі такім чынам «можна фармаваць пантэон нацыянальных герояў».