Яшчэ летам мінулага года ў парламент паступіў законапраект, які сярод іншага абмяжоўвае права на выезд з Беларусі для асобных катэгорый беларусаў. Яго доўга вывучалі і нарэшце сёння, 18 красавіка, прынялі ў другім чытанні, паведамляе прэс-служба ніжняй палаты парламента. Але з папраўкамі.
Адзначаецца, што паміж першым і другім чытаннем законапраект быў адкарэктаваны. Цяпер у ім «замацаваны парадак узгаднення (з улікам наяўнай правапрымяняльнай практыкі) выезду з Рэспублікі Беларусь кіраўнікоў дзяржаўных органаў, а таксама кіраўнікоў дзяржаўных арганізацый і работнікаў, якія ажыццяўляюць забяспечанне дзейнасці і тэхнічнае абслугоўванне дзяржаўных органаў, якім дадзены допуск да дзяржаўных сакрэтаў».
Раней у законапраекце адзначалася, што:
- КДБ зможа абмежаваць выезд не толькі тым, хто знаходзіцца на прафілактычным уліку ў органах дзяржаўнай бяспекі, але і тым, чый «выезд супярэчыць інтарэсам нацыянальнай бяспекі Рэспублікі Беларусь». Абмежаванне можа ўводзіцца на тэрмін да паўгода. Якія грамадзяне і на якіх падставах будуць трапляць у гэтую катэгорыю — не паведамляецца.
- Выезд таксама забароняць асобам, «у дачыненні да якіх вядзецца адміністрацыйны працэс за ўчыненне адміністрацыйных правапарушэнняў супраць парадку кіравання, — з мэтай забяспечання выканання пастановы суддзі пра накладанне адміністрацыйнага спагнання ў выглядзе штрафу». У «правапарушэнні супраць парадку кіравання» ўваходзяць так добра знаёмыя беларусам «палітычныя» артыкулы КаАП: непадпарадкаванне законнаму распараджэнню або патрабаванню службовай асобы падчас выкананні ёю службовых паўнамоцтваў, парушэнне парадку арганізацыі або правядзення масавых мерапрыемстваў і гэтак далей.
- Супрацоўнікам сілавых органаў можна будзе выехаць за межы Беларусі толькі пасля ўзгаднення з кіраўніцтвам. Гэта будзе датычыць вайскоўцаў, супрацоўнікаў, работнікаў і асобаў цывільнага персаналу вайсковых фарміраванняў і ваенізаваных арганізацый Беларусі.
Законапраект прыняты ніжняй палатай парламента ў другім чытанні. Цяпер яго мусяць ухваліць у Савеце Рэспублікі. Затым яго падпісвае Аляксандр Лукашэнка, пасля чаго ён атрымлівае статус закона пасля афіцыйнага апублікавання на Нацыянальным прававым інтэрнэт-партале. Пасля гэтага забарона на выезд супрацоўнікаў сілавых ведамстваў без дазволу ўступае ў сілу праз два месяцы, астатнія змены — адразу ж пасля апублікавання.