Дзяржаўны сакратар Савета бяспекі Беларусі Аляксандр Вальфовіч лічыць мэтазгодным вярнуцца да практыкі прызыву студэнтаў у войска. Пра гэта ён заявіў на нарадзе з кіраўнікамі ўстановаў вышэйшай адукацыі, піша БЕЛТА.
«Хацеў бы задаць некаторыя пытанні рэктарам, вядома, адразу не буду чакаць ад іх адказу, дам ім час для таго, каб яны гэта абдумвалі і падалі ў выглядзе сваіх думак, прапанова у Дзяржаўны сакратарыят Савета бяспекі. Як вучыць студэнтаў на вайсковых кафедрах, як наогул яны глядзяць і ставяцца да таго, каб студэнтаў прызываць ва Узброеныя сілы, як гэта было калісьці ў Савецкім Саюзе», — сказаў Вальфовіч.
Паводле яго, малады чалавек, які паступіў у вышэйшую навучальную ўстанову, потым пайшоў служыць, год адслужыў, вяртаецца на другі-трэці курс «ужо спелым».
«На яго і дзяўчаты будуць па-іншаму глядзець. І ён па-іншаму асэнсуе тое, для чаго ён наогул паступіў у вышэйшую навучальную ўстанову. І ўжо на вайсковых кафедрах можна паменшыць колькасць гадзін для навучання ў будучыні», — лічыць Вальфовіч.
Прызыў студэнтаў у савецкую армію праводзіўся з 1982 да 1989 года. Гэта дазволіла вырашыць праблему камплектавання ўзброеных сіл ва ўмовах дэмаграфічнай ямы прызыўнога кантынгенту, а таксама вайны ў Афганістане. У той жа час, як гаворыцца ў адкрытых крыніцах, гэта сур’ёзна падарвала кадравы патэнцыял краіны — знізілася кваліфікацыя выпускнікоў, у інстытуты наогул не вярнуліся 15−20% прызваных, паводле некоторых звестак — да 40%.