Дэпутаты ў другім чытанні прынялі праект закона «Пра змену кодэксаў па пытаннях крымінальнай адказнасці», паведаміла 21 лютага прэс-служба Палаты прадстаўнікоў Нацыянальнага сходу.
Мэта падрыхтоўкі праекта закона — «прыняцце мераў папераджальнага характару за здзяйсненне злачынстваў экстрэмісцкай (тэрарыстычнай) скіраванасці шляхам карэктавання Крымінальнага і Крымінальна-працэсуальнага кодэксаў».
Асноўныя змены і папраўкі:
- Праектам закона прапануецца ўнясенне зменаў у санкцыю часткі 2 артыкула 356 КК, якія прадугледжваюць магчымасць выключнай меры пакарання ў выглядзе смяротнага пакарання за здраду дзяржаве, учыненую службовай асобай, якая займае дзяржаўную пасаду, або асобай, на якую распаўсюджваецца статус вайскоўца. У сувязі з гэтым прыводзяцца ў адпаведнасць таксама артыкулы 58 і 59 КК.
- Таксама ўносяцца змены ў артыкул 360 КК — мэтай здзяйснення злачынства замест нанясення шкоды эканамічнай бяспецы і абараназдольнасці становіцца нанясенне шкоды эканамічнай і (або) ваеннай бяспецы. Пры гэтым артыкул дапаўняецца заўвагай, якая дапускае вызваленне асобы ад крымінальнай адказнасці за падрыхтоўчыя дзеянні да дыверсіі ў выпадку яе перадухілення.
- Артыкул 369−1 КК дапаўняецца кваліфікавальнай прыметай, што прадугледжвае устанаўленне адказнасці за распаўсюд заведама ілжывых звестак, якія дыскрэдытуюць Узброеныя сілы, іншыя войскі і вайсковыя фарміраванні, ваенізаваныя арганізацыі Рэспублікі Беларусь.
- Праектам закона таксама прапануецца ўсталяваць памер штрафу за антыдзяржаўныя злачынствы ў межах ад пяцісот да пяцідзесяці тысяч базавых велічыняў (ад 16 000 да 1 600 000 рублёў), а таксама ўвесці ў асобныя санкцыі нормаў асаблівай часткі КК, якія прадугледжваюць адказнасць за ўчыненне названых злачынстваў, дадатковае пакаранне ў выглядзе штрафу з мэтай пазбаўлення матэрыяльных актываў асобаў, якія ўчынілі названыя злачынствы.
- Праект закона КК дапаўняецца артыкулам 289−1 «Прапаганда тэрарызму».
- Таксама прапануецца дапоўніць КК артыкулам 375−2 «Парушэнне патрабаванняў па абароне дзяржаўных сакрэтаў».
- Змены ў частку 4 артыкула 108 КПК, прапанаваныя праектам закона, прадугледжваюць магчымасць затрымліваць асобаў па артыкулах 356 — 358−1 КК на тэрмін да 10 сутак, а абвінавачанне выстаўляць у тэрмін да 20 сутак з моманту затрымання.
- Акрамя таго, артыкул 125 КК дапаўняецца адпаведнай заўвагай пра вызваленне ад крымінальнай адказнасці асобы, якая ўдзельнічала ў падрыхтоўцы да нападу на ўстановы, што карыстаюцца міжнароднай абаронай, калі яна своечасовым папярэджаннем дзяржаўных органаў або іншым чынам пасадзейнічала перадухіленню названага злачынства.
Нагадаем, законапраект быў прыняты ў першым чытанні дэпутатамі 7 снежня мінулага года. Цяпер дакумент мусяць ухваліць у Савеце Рэспублікі, а затым накіраваць Аляксандру Лукашэнку.