У амбасадзе Германіі ў Мінску назвалі затрыманне палітыка Андрэя Дзмітрыева 11 студзеня доказам пераследу апазіцыі і запатрабавалі вызваліць усіх беларускіх зняволеных па палітычных матывах.
— Мы шакаваныя навіной пра ўчарашняе затрыманне былога кандыдата ў прэзідэнты Андрэя Дзмітрыева, — заявілі ў дыпмісіі, падкрэсліўшы, што па-ранейшаму не маюць інфармацыі пра прычыны яго знаходжання на Акрэсціна і пра магчымасць доступу да яго адваката.
Змяшчэнне палітыка ў СІЗА дыпламаты назвалі «чарговым доказам уціску і пераследу беларускай апазіцыі, якія набылі беспрэцэдэнтныя маштабы», і нагадалі, што сілавікі ўжо затрымлівалі яго ў 2021 годзе.
— Федэральны ўрад Германіі чарговы раз настойліва выказвае патрабаванне неадкладнага вызвалення ўсіх, хто знаходзіцца ў зняволенні па палітычных матывах, — гаворыцца ў паведамленні амбасады.
Нагадаем, напярэдадні знаёмы палітыка Андрэя Дзмітрыева паведаміў «Люстэрку» пра яго затрыманне. Паводле нашай інфармацыі, цяпер Дзмітрыеў знаходзіцца на Акрэсціна, дэталі яго затрымання высвятляюцца.
Андрэй Дзмітрыеў — экс-сустаршыня ліквідаванага ўладамі грамадскага руху «Гавары праўду». Ён быў створаны ў 2010 годзе. Першым лідарам стаў беларускі паэт Уладзімір Някляеў, які вылучыўся кандыдатам на прэзідэнцкіх выбарах 2010 года. Паводле звестак Цэнтрвыбаркама, Някляеў набраў 1,78% галасоў.
На наступных прэзідэнцкіх выбарах «Гавары праўду» стала платформай для кандыдата Таццяны Караткевіч. Яна заняла другое месца з 4,44%.
На выбарах 2020 года кандыдатам у прэзідэнты стаў сам Андрэй Дзмітрыеў, які, паводле інфармацыі ЦВК, набраў 1,21% галасоў.
12 жніўня 2021 года Дзмітрыева ўжо затрымлівалі сілавікі. Увечары таго ж дня яго адпусцілі. 8 кастрычніка 2021 года Вярхоўны суд ліквідаваў «Гавары праўду».