У Беларусі скончыліся мерапрыемствы па зверцы ўліковых звестак — яе прайшло 95% ваеннаабавязаных, паведамілі ў прэс-службе Мінабароны.
У ведамстве нагадалі, што праверка праводзілася з сярэдзіны кастрычніка па снежань 2022 года на даручэнне Лукашэнкі.
Там заявілі, што беларусы «з высокай адказнасцю і разуменнем паставіліся да мерапрыемстваў па ўмацаванні абараназдольнасці дзяржавы»: паводле інфармацыі Мінабароны, зверку ўліковых звестак прайшло больш за 95% ваеннаабавязаных.
— Астатнія — гэта тыя, хто альбо хварэў, альбо знаходзіўся за мяжой, — удакладнілі ў прэс-службе.
Зверку звестак праводзілі мясцовыя органы ўлады і арганізацыі сумесна з ваенкаматамі — гэта дазволіла ўдакладніць інфармацыю, «неабходную ва ўмовах наяўнай ваенна-палітычнай абстаноўкі».
Нагадаем, 4 кастрычніка падчас нарады з сілавікамі Аляксандр Лукашэнка згадаў досвед расійскай частковай мабілізацыі і заявіў, што ў Беларусі трэба яго ўлічваць «нягледзячы на тое, што ў Беларусі ў гэтым няма неабходнасці». Ён даручыў правесці праверку ваеннаабавязанага складу «без усякага гвалту, без шуму».
У Мінабароны паведамілі, што гэтыя мерапрыемствы «носяць выключна планавы характар» і праводзяцца «кожны год», аднак такой маштабнай зверкі звестак у апошнія гады ў Беларусі не было.
Скончыць праверачныя мерапрыемствы абяцалі да канца 2022 года. Аднак на практыцы звесткі працягвалі звяраць нават у пачатку студзеня.
