Мінскі абласны суд 12 снежня вынес прысуд чатыром палітвязням з Салігорска. Трэнера Алега Гаўрылава і яго знаёмых, Сяргея Пасюка і мужа і жонкі Алега і Таццяну Біруляў, асудзілі на сур’ёзныя тэрміны пазбаўлення волі за «палітычныя» надпісы на сценах і распаўсюд самвыдату, паведамляе праваабарончы цэнтр «Вясна».
Усіх чацвярых арыштавалі роўна год таму — 13 снежня 2021-га, з таго часу яны знаходзіліся ў СІЗА. Першапачаткова салігорцаў затрымалі за распаўсюд пратэсных газет, але падчас следства колькасць артыкулаў абвінавачвання вырасла.
Паводле матэрыялаў справы, у пачатку 2021 года Алег Гаўрылаў купіў і перадаў Таццяне і Алегу Бірулям балончыкі з фарбай, то-бок «прыладу злачынства». Яны затым наносілі надпісы і малюнкі на розныя аб’екты ў Салігорску, у тым ліку на сцяне аднаго з дамоў напісалі, што Лукашэнка здзейсніў «асабліва цяжкае злачынства», чым, на думку абвінавачання, абгаварылі палітыка.
Затым, гаворыцца ў справе, Гаўрылаў прыцягнуў да дзейнасці Сяргея Пасюка, у тым ліку за аплату. І ўсе разам са жніўня па снежань распаўсюджвалі ў Салігорску ўлёткі і іншую друкаваную прадукцыю з заклікамі да захопу ўлады, звяржэння канстытуцыйнага ладу і гэтак далей, таксама ва ўлётках нібыта распальвалася сацыяльная варожасць.
Абвінавачванні салігорцам былі выстаўленыя па пяці артыкулах Крымінальнага кодэкса:
- ч. 3 арт. 130 (распальванне варожасці);
- арт. 341 (апаганьванне будынкаў і псаванне маёмасці);
- ч. 1 арт. 361 (заклікі да санкцый і іншых дзеянняў, якія шкодзяць нацыянальнай бяспецы);
- ч. 1 арт. 361−4 (садзейнічанне экстрэмісцкай дзейнасці);
- ч. 2 арт. 367 (паклёп на Лукашэнку).
Суд пачаўся 29 жніўня, але неўзабаве справу накіравалі на дадатковае следства, падчас якога КДБ уключыў палітвязняў у спіс «асоб, якія маюць дачыненне да тэрарыстычнай дзейнасці», хоць у іх абвінавачванні артыкула пра тэрарызм няма.
У выніку суддзя Алена Міснік вынесла палітвязням жорсткія прысуды. Алега Гаўрылава асудзілі на 10 гадоў пазбаўлення волі, Таццяну і Алега Біруляў — на шэсць гадоў, Сяргея Пасюка — на пяць з паловай гадоў пазбаўлення волі.