У Генеральнай пракуратуры вывучылі крымінальныя справы ў дачыненні да супрацоўніц ТАА «ТУТ БАЙ МЕДЫЯ» Людмілы Чэкінай, Марыны Золатавай, Вольгі Лойка, Алены Талкачовай, Кацярыны Ткачэнка і іншых асобаў, паведамілі ў прэс-службе нагляднага ведамства.
Паводле звестак Генпракуратуры, Чэкінай інкрымінаваныя ўхіленне ад выплаты падаткаў, арганізацыя распальвання сацыяльнай варожасці, а таксама распаўсюд матэрыялаў з заклікамі да дзеянняў, скіраваных на нанясенне шкоды нацыянальнай бяспецы Беларусі.
Золатава, Лойка і Талкачова абвінавачваюцца ў дапамаганні ва ўхіленні ад выплаты падаткаў, распальванні сацыяльнай варожасці, распаўсюдзе матэрыялаў з заклікамі да дзеянняў, скіраваных на нанясенне шкоды нацыянальнай бяспецы Беларусі.
Ткачэнка абвінавацілі ў дапамаганні ва ўхіленні ад выплаты падаткаў, актыўным удзеле ў групавых дзеяннях, якія груба парушаюць грамадскі парадак.
«Згодна з матэрыяламі справаў, таварыства з’яўлялася рэзідэнтам Парку высокіх тэхналогій (далей — ПВТ, парк) і мела шэраг падатковых ільгот. Генеральным дырэктарам у ім была Чэкіна. Устаноўлена, што сэрвіс „kupi.tut.by“ не з’яўляўся ўласнай распрацоўкай таварыства, а пры яго функцыянаванні выкарыстоўвалася праграмнае забяспечанне іншай кампаніі», — расказалі ў прэс-службе ведамства.
Генпракуратура сцвярджае, што «з мэтай атрымання падатковых прэферэнцый як рэзідэнта ПВТ у 2019 годзе была ўкарэненая схема па „драбненні бізнесу“: створанае падкантрольнае ТАА „Паблішэр бокс“, на якое для далейшага атрымання выручкі фармальна „перавялі“ функцыі аказання пасрэдніцкіх паслуг, звязаных з распрацоўкай, вырабам рэкламных матэрыялаў, размяшчэннем рэкламы на інтэрнэт-рэсурсах удзельнікаў дамоўных адносін і іншых паслуг з выкарыстаннем іншага праграмнага забяспечання».
«Ажыццяўленне вышэйадзначанай дзейнасці было несумяшчальнае з удзелам у парку, у сувязі з чым адсутнічалі падставы для падатковых паслабленняў, пры гэтым у адміністрацыю ПВТ падаваліся недакладныя звесткі наконт рэальнага становішча справаў. Як вынік — у бюджэт у 2019−2021 гадах недаплачана больш за 3 млн рублёў падаткаў», — паведаміла прэс-служба Генпракуратуры.
Акрамя таго, у ведамстве сцвярджаюць, што Людміла Чэкіна таксама арганізавала, а Золатава, будучы галоўным рэдактарам, нароўні з іншымі асобамі, у тым ліку Лойка і Таўкачовай, мела непасрэднае дачыненне да апублікавання ў 2020−2021 гадах на рэсурсе «tut.by» і звязаных з ім акаўнтах у сацыяльных сетках інфармацыйных матэрыялаў, якія ўтрымлівалі ў тым ліку:
- заведама пазітыўную ацэнку дзеянняў апанентаў улады;
- свядома негатыўную інтэрпрэтацыю рашэнняў службовых асоб, іншых грамадзян, якія выступалі за захаванне дзейнага канстытуцыйнага ладу;
- стоеную каардынацыю пратэснай актыўнасці ў грамадстве;
- звесткі, скіраваныя на дэстабілізацыю сітуацыі ў краіне і нанясенне шкоды нацыянальнай бяспецы Беларусі.
«Ткачэнка ў верасні 2020 года ў сталіцы ўдзельнічала ў групавых дзеяннях, якія груба парушаюць грамадскі парадак. Па выніках вывучэння матэрыялаў крымінальных справаў у дачыненні да Людмілы Чэкінай, Марыны Золатавай, Вольгі Лойка, Алены Талкачовай, Кацярыны Ткачэнка прынятае рашэнне аб накіраванні іх у суд.
Іншыя 9 фігурантаў, якім інкрымінаванае дапамаганне ва ўхіленні ад выплаты падаткаў, цалкам прызналі віну, кампенсавалі нанесеную злачынствам шкоду і заявілі хадайніцтвы ў адрас прэзідэнта Рэспублікі Беларусь аб вызваленні ад крымінальнай адказнасці на падставах, прадугледжаных арт. 88−1 Крымінальнага кодэкса Рэспублікі Беларусь.
«Справа TUT.BY»
Нагадаем, раніцай 18 траўня 2021 года сілавікі прыйшлі дадому да некаторых супрацоўнікаў кампаніі і прадстаўнікоў партнёрскіх арганізацый, а таксама ў офісы TUT.BY у Мінску і абласных цэнтрах. Да позняга вечара ў сталічным офісе праходзіў ператрус, а ў Дэпартаменце фінансавага кантролю КДК пасля такіх жа дзеянняў дома ў супрацоўнікаў дапытвалі нашых былых калег. Некаторых з дому забралі ў статусе сведкі, а ўвечары таго ж дня яны былі ў ІЧУ на Акрэсціна як падазраваныя па крымінальнай справе. У той дзень затрымалі 15 чалавек.
Марына Золатава і Людміла Чэкіна — адзіныя фігуранты «справы TUT.BY», якія дагэтуль застаюцца за кратамі. Яны прызнаныя палітвязнямі. КДБ уключыў іх у спіс «асоб, якія маюць дачыненне да тэрарыстычнай дзейнасці».