У Мінпрацы растлумачылі, ці ўлічваецца падчас прызначэння пенсіі дэкрэтны адпачынак. Калі каротка, то яго ўключаюць у агульны стаж працы, а ў страхавы — не. Праз гэта некаторыя рызыкуюць трапіць у пенсійную пастку.
З 1 студзеня 2021 года ў агульны пенсійны стаж залічваюць не больш за 12 гадоў дэкрэтнага адпачынку (калі ў жанчыны некалькі дзяцей).
Пры гэтым для прызначэння працоўнай пенсіі па ўзросце неабходны не толькі агульны стаж, але і страхавы — праца з выплатай страхавых унёскаў у Фонд сацыяльнай абароны насельніцтва. З гэтага года ніжняя планка па ім складае 20 гадоў. Дэкрэтны адпачынак у яго не ўключаюць.
«Маці, якія нарадзілі чатырох дзяцей і выхавалі іх да 8-гадовага ўзросту, для прызначэння пенсіі па ўзросце зніжаны страхавы стаж з 10 гадоў да 5 гадоў. Аналагічна прадугледжана для жанчын з 5 і больш дзецьмі», — расказала намесніца начальніка ўпраўлення народанасельніцтва, гендарнай і сямейнай палітыкі Мінпрацы Святлана Коваль.
Чаму страхавы стаж так важны
Ён неабходны для атрымання працоўнай пенсіі. У гэты стаж уваходзіць толькі той час, калі вы працавалі і працадаўца плаціў за вас страхавыя ўнёскі ў Фонд сацыяльнай абароны. Цяпер мінімальны страхавы стаж складае 20 гадоў. Нагадаем, у 2013 годзе гэты паказчык павялічыўся з пяці да дзесяці гадоў. Беларусы, якія не выпрацавалі страхавога стажу паводле новых правілаў, трапляюць у пенсійную пастку — яны не могуць прэтэндаваць на працоўную пенсію, ім могуць прызначыць толькі сацыяльную: жанчынам — з 60 гадоў, а мужчынам — з 65 гадоў. Пры гэтым стандартны пенсійны ўзрост — 58 гадоў і 63 гады адпаведна. Цяпер сацыяльная пенсія складае 231,29 рубля.
Раней, з 1 студзеня 2020 года, у страхавы стаж пачалі ўключаць тэрміновую службу ў войску. Гэтага новаўвядзення на стадыі абмеркавання не падтрымлівалі ў Мінпрацы і Мінфіне. Пры гэтым па навучанні ў ВНУ і дэкрэтным адпачынку, уключэнне ў страхавы стаж якіх абмяркоўвалася нароўні са службай у войску, улады змяненняў не прынялі.
Чытайце таксама
