Міністэрства замежных справаў Польшчы лічыць, што адказам на новую хвалю рэпрэсій у Беларусі мусіць стаць прыняцце новага пакета санкцый у дачыненні да беларускіх уладаў.
«Масавыя затрыманні сярод былых вязняў сумлення, якія праводзяцца беларускімі ўладамі, а таксама сем’яў палітвязняў патрабуюць рашучай рэакцыі. Прыняцце чарговага пакета санкцый супраць Беларусі мусіць адбыцца як мага хутчэй», — гаворыцца ў паведамленні польскага знешнепалітычнага ведамства ў сацсетцы Х.
На сайце МЗС Польшчы закліку да новых санкцый няма, але ў заяве, апублікаванай польскім ведамствам, гаворыцца пра тое, што «сітуацыя з правамі чалавека ў Беларусі робіцца ўсё больш драматычнай», а таксама пра «рашучае асуджэнне сістэмных рэпрэсій беларускіх уладаў супраць уласнага грамадства».
«Сітуацыя з правамі чалавека ў Беларусі робіцца ўсё больш драматычнай. Ціск рэжыму Лукашэнкі на грамадзянскую супольнасць і палітычных апанентаў, які ўзмацняецца ў апошнія тыдні, скіраваны на запалохванне беларусаў — прымус іх да маўчання або выезду з краіны», — гаворыцца ў заяве.
У МЗС Польшчы нагадалі, што тысячы беларусаў трапілі за краты пасля выбараў 2020 года, і прынамсі 1400 палітычных зняволеных застаюцца ў турмах. У ведамстве падкрэслілі, што «ўмовы ўтрымання праціўнікаў рэжыму — гэта абраза чалавецтва: апазіцыянеры адбываюць пакаранне ў перапоўненых халодных камерах, з абмежаваным доступам да медыцынскай дапамогі і абмежаваным кантактам са сваімі блізкімі».
Чарговым разам у МЗС Польшчы заклікалі беларускія ўлады вызваліць усіх палітычных зняволеных і спыніць рэпрэсіі супраць уласнага грамадства.
Нагадаем, масавы рэйд праходзіць з 23 студзеня па былых палітычных зняволеных і сваяках цяперашніх. Людзей дапытваюць і затрымліваюць. Праваабаронцам вядома пра не менш чым 100 такіх фактаў, паводле звестак кіраўніка BYSOL Андрэя Стрыжака, на раніцу 25 студзеня гаворка ідзе пра 143. Сілавікоў цікавілі тыя, хто атрымаў прадуктовую дапамогу ад ініцыятывы INeedHelpBY. Звесткі пра атрымальнікаў такой дапамогі яны ўзялі з сэрвісу «Е-дастаўка», які належыць"Еўраопту". Аднак затрымлівалі не толькі тых, каму дапамог INeedHelpBY.