Лідарка беларускіх дэмакратычных сіл Святлана Ціханоўская 13 верасня выступіла з прамовай у Еўрапарламенце. Яна заявіла, што Крэмль з дапамогай Лукашэнкі вядзе «ціхую вайну» супраць Беларусі, каб ператварыць яе ў расійскую калонію, аднак беларусы зрабілі выбар на карысць Еўропы і гатовыя яго адстойваць. Палітык заклікала падтрымаць дэмакратычную Беларусь і дапамагчы прыцягнуць Лукашэнку да адказнасці.
— У адрозненне ад вайны ва Украіне, нашая вайна — ціхая. Але мэта Крамля ў ёй абсалютна такая ж: ператварыць суверэнную краіну — Беларусь — у чарговую паднявольную калонію Расіі, — сказала ў сваім выступе Святлана Ціханоўская, адзначыўшы, што дасягнуць гэтай мэты Пуціну дапамагае Лукашэнка.
Аднак у гэтай «ціхай вайне», дадала яна, паказала сябе мноства «ціхіх герояў» — «рэйкавыя партызаны», якія спрабавалі спыніць вайсковыя эшалоны на дарозе ва Украіну, праваабаронцы, сумленныя педагогі, чыноўнікі і бізнесоўцы, добраахвотнікі, якія ваююць ва Украіне.
— Нядаўна мая сямігадовая дачка папрасіла даць ёй трохі грошай. Я спытала: «На што?» Ведаеце, што яна адказала? «Хачу купіць танк, каб вызваліць тату». Кожны тыдзень яна дасылае тату паштоўкі, але ніколі не атрымлівае адказу. Для мяне яна — мой маленькі герой. Яе тату, майго мужа Сяргея, асудзілі на 19 гадоў. Ужо паўгода ад яго няма ні слова. І ён — мой вялікі герой. Самы вялікі ў маім жыцці, — расказала Ціханоўская.
Палітык заявіла, што беларусы бачаць сваю будучыню ў Еўропе і даказалі свой еўрапейскі выбар у 2020 годзе.
— Еўрапейскі саюз — ад Лісабона да Мінска — гэта кашмар для Пуціна. Але для нас гэта рэальнасць, у якой мы імкнёмся жыць, — сказала яна.
Яна папрасіла Еўрапарламент падтрымаць рэзалюцыю дэмакратычных сіл з прызнаннем еўрапейскіх памкненняў беларусаў і вывесці адносіны паміж дэмакратычнай Беларуссю і Еўрапарламентам на новы ўзровень.
Акрамя таго, Ціханоўская заклікала не аслабляць ціск на беларускія ўлады і дапамагчы прыцягнуць Лукашэнку да адказнасці.