Брытанска-шведская фармацэўтычная кампанія AstraZeneca заявіла, што адклікае сваю вакцыну супраць каранавіруса па ўсім свеце праз «лішак удасканаленых вакцын», даступных на рынку. Акрамя таго, вытворца афіцыйна прызнаў, што яго прэпарат можа выклікаць небяспечны пабочны эфект, паведамляе Reuters.
Заява кампаніі пра адкліканне вакцыны была пададзеная 5 сакавіка і ўвайшла ў дзеянне 7 траўня. Вытворца таксама паведаміў, што спыніць рэгістрацыю вакцыны Vaxzevria ў Еўропе.
«З таго часу, як было распрацавана мноства варыянтаў вакцын супраць COVID-19, назіраецца лішак прэпаратаў, якія на цяперашнім этапе больш чым даступныя», — заявілі ў кампаніі.
Там адзначылі, што такі стан справаў прывёў да зніжэння попыту на вакцыну Vaxzevria, якая з гэтага часу больш не вырабляецца, а яе пастаўкі спыненыя.
Акрамя таго, як піша The Telegraph, у канцы красавіка AstraZeneca ўпершыню афіцыйна прызнала, што яе антыкавідная вакцына можа выклікаць пабочныя эфекты, у тым ліку ўтварэнне тромбаў і зніжэнне ўзроўню трамбацытаў у крыві.
51 чалавек падаў калектыўны пазоў да вытворцы. Яны патрабуюць кампенсацыі шкоды на 125 млн даляраў, іх адвакаты сцвярджаюць, што вакцына AstraZeneca небяспечная, а яе эфектыўнасць перабольшаная.
Упершыню пра пабочны эфект ад вакцыны заявіў пацыент у 2021 годзе — у мужчыны пасля прышчэпкі гэтым прэпаратам утварыўся тромб і адбылося кровазліццё ў мозг.