Прэзідэнт Расіі Уладзімір Пуцін напярэдадні Новага года падарыў удзельнікам нефармальнага саміту краін СНД пярсцёнкі з сімволікай Садружнасці. Падарунак адразу надзеў Аляксандр Лукашэнка.
На кожным пярсцёнку з металу, падобнага да белага і жоўтага золата, размешчаная сімволіка СНД, віншаванне «З Новым годам 2023» і «Расія».
Уладальнікамі пярсцёнкаў сталі сам Уладзімір Пуцін, Аляксандр Лукашэнка, прэзідэнт Азербайджана Ільхам Аліеў, прэзідэнт Казахстана Касым-Жамарт Такаеў, прэзідэнт Кыргызстана Садыр Жапараў, прэзідэнт Таджыкістана Эмамалі Рахмон, прэзідэнт Туркменістана Сердар Бердымухамедаў, прэзідэнт Узбекістана Шаўкат Мірзіёеў і прэм’ер-міністр Арменіі Нікол Пашынян.
Падарунак адразу ж надзеў Аляксандр Лукашэнка. Пярсцёнак на яго руцэ заўважылі і на цырымоніі фотаздымкі перад пачаткам нефармальнага саміту, і на самім паседжанні.
У сеціве падораныя пярсцёнкі адразу ж параўналі з «Пярсцёнкамі ўлады», прыдуманымі Джонам Рональдам Руэлам Толкінам. Нагадаем, «Пярсцёнкі ўлады» (або Вялікія пярсцёнкі) з’явіліся ў цыкле «Уладар пярсцёнкаў». У ім фігуравалі 19 магічных пярсцёнкаў, уключаючы «тры пярсцёнкі эльфаў, сем пярсцёнкаў гномаў і дзевяць пярсцёнкаў людзей». Найбольшую ўладу меў дваццаты пярсцёнак — «Пярсцёнак Усяўладдзя», створаны Цёмным уладцам Саўранам.
Тыя ж пярсцёнкі, якія былі зробленыя для людзей, былі раздадзеныя дзевяці каралям, каб прышчапіць ім прагу ўлады і павярнуць да зла. З часам каралі сталі Прывідамі пярсцёнка, або назгуламі.