Выпускнікоў медыцынскіх ВНУ можна ўтрымаць у рэгіёнах не заробкамі і жыллём, а магчымасцю прафесійнага росту, — такое меркаванне ў эфіры СТБ выказаў рэктар Віцебскага дзяржаўнага ордэна Дружбы народаў медыцынскага ўніверсітэта Аляксей Чуканаў. Паводле яго, гэты падыход ужо прыносіць плён.
Рэктар заявіў, што ў ВНУ «мэтаскіравана абмяркоўвалі гэта досыць часта (як маладых спецыялістаў можна пакінуць працаваць у рэгіёне. — Заўв. рэд.)»:
— Першае — гэта магчымасць прафесійнага росту далейшага. Гэта не грошы, гэта не жыллё. Гэта магчымасць прафесійна падрасці, у тым ліку займацца навукай, павышаць свае кампетэнцыі, — сказаў Чуканаў.
Ён дадаў, што жыллёвыя пытанні медыкаў, якія прыехалі па размеркаванні, «на сёння дастаткова добра вырашаюцца»:
— Сёння дзякуючы рашэнню Міністэрства аховы здароўя была створаная сетка па падтрымцы маладых спецыялістаў — адкрытыя сектары падтрымкі маладых спецыялістаў, у нас у ВНУ — упершыню. Там працуюць кваліфікаваныя і юрысты ў аддзеле і спецыялісты, якія могуць яму падказаць нейкія юрыдычныя пытанні, адпаведна, гэта і эканамічны блок, якія выплаты належаць. Гэта і псіхалагічная дапамога, каб людзі не адчувалі сябе кінутымі, — расказаў рэктар.
З ягоных словаў, супрацоўнікі ВНУ, у тым ліку ён сам, «рэгулярна практычна раз на 2−3 месяцы» выязджаюць і глядзяць, як на месцах праходзіць «працэс ужывання» выпускнікоў у калектыў.
— І трэба сказаць, што мы цяпер, размаўляючы з людзьмі, усё часцей чуем: я застануся тут працаваць пасля таго, як адпрацую належную колькасць гадоў, — адрапартаваў Чуканаў.
Нагадаем, у красавіку, паводле звестак Белстата, у Беларусі быў зафіксаваны найбуйнейшы адток кадраў за шэсць гадоў. Сур’ёзная сітуацыя ў ахове здароўя — мінус амаль 2,8 тыс. чалавек. Там звольнілі ў два разы больш, чым нанялі: 5,2 тыс. супраць 2,5 тыс. Пры гэтым чыноўнікі сур’ёзна заклапочаныя дэфіцытам кадраў у бальніцах і паліклініках, называючы кадравае забяспечанне там адным з балючых пунктаў, які патрабуе прыняцця аператыўных мер.
Чытайце таксама
