Здраднікі і сабатажнікі. Прадстаўнік Генштаба расказаў, каго аднясуць да пагрозаў нацыянальнай бяспецы Беларусі

Да пагрозаў нацыянальнай бяспецы Беларусі будуць аднесеныя арганізацыі, якія заклікаюць да развязвання грамадзянскай вайны ў краіне, а таксама здраднікі і сабатажнікі. Пра гэта ў эфіры тэлеканала СТБ расказаў прадстаўнік Генштаба Узброеных сіл Арцём Буторын.

Адказваючы на пытанне пра выклікі і пагрозы, якія стаяць перад нашай дзяржавай, Буторын заявіў, што ў мадэрнізаванай Канцэпцыі нацыянальнай бяспекі ўпершыню быў выкарыстаны суб’ектны падыход.

«Мы развілі той тэарэтычны падыход, які быў выкарыстаны ў 2010 годзе, больш выразна размежавалі гэтыя паняцці. То-бок градацыя па рызыцы і выкліку пагрозы дазваляе нам рэагаваць не па факце, калі пагроза ўжо з’явілася, а па факце, калі яна толькі фармуецца і зараджаецца. Быў выкарыстаны ўпершыню суб’ектны падыход. Калі раней крыніцы пагрозы намі трактаваліся як сукупнасць фактараў, якія фармуюць гэтую непасрэдную пагрозу, то цяпер мы таксама адсочваем суб’екты, якія маюць нейкія інтарэсы, намеры, у тым ліку і дэструктыўныя, што да нашай дзяржавы», — расказаў прадстаўнік Генштаба.

Паводле яго словаў, цяпер да крыніц пагрозаў будуць адносіць не толькі «злачынныя тэрарыстычныя арганізацыі, якія прапагандуюць развязванне грамадзянскай вайны на тэрыторыі Рэспублікі Беларусь, заклікаюць да вайны», але і новыя суб’екты.

«З'явіліся такія суб’екты, як здраднікі сабатажнікі, якія наносяць сваімі дзеяннямі або бяздзейнасцю непасрэдную шкоду ваеннай бяспецы РБ. Ну, а калі браць знешнія крыніцы пагрозаў, то нароўні з традыцыйна недружалюбнымі да нас дзяржавамі і ваенна-палітычнымі блокамі мы цяпер вылучаем у тым ліку недзяржаўных актараў, у тым ліку міжнародныя тэрарыстычныя арганізацыі», — падсумаваў ён.

Нагадаем, раней дзяржаўны сакратар Савета бяспекі Аляксандр Вальфовіч заявіў, што Канцэпцыя нацыянальнай бяспекі Беларусі аб’ектыўна патрабавала карэктавання і адаптацыі да сучасных рэалій.

Сярод ключавых фактараў, якія сталі падставай для мадэрнізацыі Канцэпцыі, ён у першую чаргу назваў фактычнае перафарматаванне цяперашняй мадэлі светабудовы.

Новая Канцэпцыя нацбяспекі была падрыхтаваная міжведамаснай рабочай групай, у якую ўвайшлі прадстаўнікі 34 органаў і арганізацый.