Літоўскі мытны пост «Мядзінінкай» на мяжы з Беларуссю аказаўся «захоплены» незвычайнымі падарожнікамі — там пад навесам вырашыў уладкавацца рой пчол, расказала літоўская мытня.
Мяркуючы з усяго, пчолы прыляцелі з літоўскага боку, імаверна, з размешчанай паблізу пасекі.
Звычайна ў адным роі бывае да 25 000 пчол. Паколькі кожная з іх нясе з сабой невялікі запас мёду — свайго роду «будаўнічы матэрыял» для новага вулля, — груз мёду правяраць не давялося, запэўнілі літоўскія мытнікі.
Там дадалі, што такое раенне — гэта натуральны спосаб размнажэння пчол: частка сям'і аддзяляецца і выпраўляецца на пошукі новага дома.
Пчол шчасна сабралі і перадалі пчаляру.
